ܡܨܰܠܶܘܽܘ ܒܟܽܠ ܙܰܒܢܳܐ ܐܶܦܶܣܳܝ̈ܶܐ ܘ،ܐܚ

ܦܰܘܠܽܘܣ ܐܽܘ ܫܠܺܝܚܳܐ ܟܳܡܰܚܘܶܐܠܰܢ ܗܰܪܟܶܐ ܐܽܘ ܙܰܝܢܳܐ ܕܰܐܩܘܰܝ ܡܺܝܢܶܗ ܠܰܝܬ، ܘܗܰܐܢܳܐ ܟܷܬܠܶܗ ܐܽܘ ܡܗܰܝܡܢܳܐ. ـ ܟܽܘܠ ܕܷܡܗܰܝܡܷܢ ܒܽܘ ܚܰܝܠܳܐ ܕܝܶܫܽܘܥ، ܕܟܷܬܝܳܐ ܐܽܘ ܡܫܰܦܥܳܢܳܐ ܕܒܰܝܢ ܠܰܐ‌ܠܳܗܳܐ ܘܠܰܐܢܢܳܫ̈ܶܐ، ܕܶܐܒܶܗ ܟܳܟ݂ܽܘܠܨܺܝܢܰܐ ـ. ܗܰܢܳܝܳܐ ܐܽܘ ܙܰܝܢܳܐ: ܐܺܝ ܨܠܽܘܬ݂ܳܐ. ܥܰܠ ܬܠܳܬ݂ܳܐ ܡܶܕܳܢ̈ܶܐ ܟܳܐܡܷܪ ܦܰܘܠܽܘܣ ܒܺܝ ܕܽܘܟܬ݂ܰܬ݂ܶܗ ܕܺܐܝ ܨܠܽܘܬ݂ܳܐ.

1. ܒܰܚܰܝ̈ܶܐ ܠܳܐ ܛܳܪܺܝܢܰܐ ܡܺܝ ܨܠܽܘܬ݂ܳܐ. ܥܰܡ ܐܽܝ ܨܠܽܘܬ݂ܳܐ ܛܪܳܐ ܡܺܝܕܰܒܪܺܝܢܰܐ ܐܽܘ ܥܽܘܡܪܰܝܕ݂ܰܢ ܟܽܘܠܶܗ. ܐܶܠܳܐ ܟܳܡܰܫܺܝܟܺܝܢܰܐ، ܕܰ»ܚܰܝ̈ܶܐ ܕܺܐܝ ܨܠܽܘܬ݂ܳܐ« ܒܰܣ ܒܰܙܰܒܢ̈ܶܐ ܕܰܥܺܝ̈ܩܳܬ݂ܶܐ ܟܳܐܘܷܝܢ ܚܺܝ̈ܨܶܐ ܘܥܰܡܽܘ̈ܩܶܐ، ܘܗܰܐܬ݂ܶܗ ܢܳܩܽܘܨܽܘܬ݂ܳܐ ܓ݂ܰܠܰܒ̈ܶܐ ܪܰܒܬ݂ܳܝܳܐ ܒܰܚܰܝܼܰܝ̈ܕ݂ܰܢ. ܐܺܝ ܩܰܘܝܽܘܬ݂ܳܐ ܘܽܐܘ ܚܰܝܠܳܐ ܕܺܐܝ ܗܰܝܡܳܢܘܬ݂ܳܐ ܟܳܢܷܦܩܳܐ ܡܺܝ ܨܠܽܘܬ݂ܳܐ ܝܰܘܡܳܢܰܝܬܳܐ ܘܒܺܝ ܫܰܘܬܳܦܽܘܬ݂ܳܐ ܕܺܐܝ ܡܷܠܬ݂ܳܐ ܕܟܷܬܝܳܐ ܡܽܘܟܠܳܐ ܪܽܘܚܳܝܳܐ.

2. ܓܠܳܐܙܷܝܡ ܕܠܳܐ ܟܠܳܐܝܳܐ، ܡܽܘ ܠܶܒܳܐ ܒܚܺܝܨܽܘܬ݂ܳܐ ܘܒܽܘ ܢܛܳܪܳܐ ܘܒܽܘ ܫܗܳܪܳܐ ܡܨܰܠܺܝܢܰܐ. ܐܽܝ ܨܠܽܘܬ݂ܰܝܕ݂ܰܢ ܛܪܽܘܝܳܐ ܡܰܚܷܣܬܳܐ. ܨܠܽܘܬ݂ܳܐ ܕܠܳܐ ܚܰܝܠܳܐ ܠܷܓܫܽܘܩܠܳܐ ܬܷܡܡܶܕܶܐ. ܒܺܝ ܨܠܽܘܬ݂ܳܐ ܐܰܚܰܝܠܰܝ̈ܕ݂ܰܢ ܟܽܘܠܠܶܗ ܛܪܳܐ ܠܰܝܡܺܝ ܥܰܠ ‌ܐܺܝ ܐܺܝܒܰܥܬܳܐ ܕܺܐܝ ܨܠܽܘܬ݂ܳܐ؛ ܐܽܘ ܡܓܰܠܝܽܘܢ ܟܳܡܰܪܠܰܢ: ܠܳܐ ܡܷܬܟܰܣܠܽܘܬܽܘ ܒܺܝ ܨܠܽܘܬ݂ܳܐ (1.ܩܽܘܪ̈ܺܝܢܬ݂ܳܝܶܐ ܗ،ܝܙ).

3. ܡܨܰܠܺܝܢܰܐ، ܘܠܳܐ ܩܰܡܰܝܬܳܐ ܫܰܢܰܢ. ܐܺܝ ܨܠܽܘܬ݂ܰܝܕ݂ܰܢ ܛܪܽܘܝܳܐ ܠܽܘ ܥܰܡܳܐ ܕܰܐܠܳܗܳܐ ܟܽܘܠܶܗ. ܓ݂ܰܠܰܒ̈ܶܐ ܡܺܝܢܰܢ ܒܙܰܐܘܽܘܕܳܐ ܠܪܽܘܚܰܝܢܰܐ ܟܳܡܨܰܠܺܝܢܰܐ ܘܟܳܛܳܥܺܝܢܰܐ ܐܰܚܪ̈ܶܢܶܐ ܘܰܐ ܩܰܛܪ̈ܰܬ݂ܬ݂ܶܗ. ܘܰܐܔܷܒܝܳܐ ܕܝܽܘܠܦܺܝܢܰܐ ܥܰܝܢ ܗܰܘܟ݂ܰܐ ܓ݂ܰܠܰܒ̈ܶܐ ܕܠܳܐ ܟܠܳܝܳܐ ܘܕܠܳܐ ܟܰܣܽܘܠܽܘܬ݂ܳܐ ܡܨܰܠܽܝܢܰܐ ܠܰܚܪ̈ܶܢܶܐ ܟ݂ܽܘܕ ܠܪܽܘܚܰܢ. ܐܺܝ ܨܠܽܘܬ݂ܳܐ ܕܥܰܡ ܚ̈ܕ݂ܳܕ݂ܶܐ ܒܺܝ ܥܺܕ̱ܬܳܐ ܟܳܡܶܛܝܳܐ ܘܢܶܔܚܳܐ ܠܙܷܝܕ. ܟܽܘܠ ܡܨܰܠܝܳܢܳܐ ܛܪܳܐܕ݂ܷܥ، ܐܳ‌ܠܨܳܝܳܝܳܐ ܕܟܽܘܠ ܡܒܰܫܪܳܢܳܐ ܕܽܐܘ ܡܓܰܠܝܽܘܢ ܟܠܳܙܰܡܠܶܗ ܨܠܽܘܬ݂ܳܐ ܕܟܳܣܷܢܕܳܐܠܶܗ ܒܺܝ ܘܳܠܺܝܬ݂ܰܝܕ݂ܶܗ، ܒܽܘ ܟܪܳܐܙܰܝܕ݂ܶܗ. ܡܰܘܟ݂ܰܐ ܟܶܒܥܺܝܢܰܐ ܒܙܰܘܘܽܕܳܐ ܠܰܫܷܢ ܗܰܐܢܶܟ ܡܠܰܥܺܝܢܰܐ ܩܷܡ ܡܳܪܝܳܐ.

ܐܽܘ ܡܰܕ݂ܟܪܳܢܳܐ ܕܡܳܪܝܳܐ

ܡܶܐܩܷܡ ܒܒܶܝܬ݂ ܢܰܗܪ̈ܺܝܢ ܟܶܬܘܰܠܠܶܗ ܓ݂ܰܠܰܒ̈ܶܐ ܡܰܐ ܡܰܠܟ̈ܶܐ، ܡܰܕ݂ܟܪ̈ܳܢܶܐ ܒܽܘ ܟ݂ܕܳܡܰܬ݂ܬ݂ܶܗ. ܟܶܬܘܰܠܠܶܗ ܐܽܘ ܫܽܘܓ݂ܠܰܘܳܐ، ܕܡܰܝܬܺܝ ܠܒܳܠܶܗ ܕܽܐܘ ܡܰܠܟܳܐ ܓܽܘܕ ܗܳܘܶܐܘܰܝܠܶܗ ܩܰܘ̈ܠܶܐ، ܘܰܥ̈ܕܶܐ ܕܺܝܠܳܢܳܝ̈ܶܐ ܕܗܺܝܘܺܝܠܶܗ ܡܶܐܩܷܡ. ܘܰܐܢܢܰܩܩܰܐ ܡܳܪܝܳܐ ܩܪܶܐܠܶܗܠܰܢ، ܕܗܳܐܘܺܝܢܰܐ ܥܰܡܳܐ ܡܨܰܠܝܳܢܳܐ ܘܡܰܝܬܺܝܢܰܐ ܠܒܳܠܶܗ ܘܡܰܕ݂ܟܪܺܝܢܰܐ ܐܰ»ܘܰܥܕܰܝ̈ܕ݂ܶܗ«. ܟܺܝܬ ܕܓ݂ܰܠܰܒ̈ܶܐ ܡܔܰܪܒܳܝܳܐ ܕܗܰܘܟ݂ܰܐ ܐܳܡܰܪܢܳܐ، ܒܰܣ ܡܳܪܝܳܐ ܣܬܶܗ ܟܳܐܡܷܪ ܒܶܐܫܰܥܝܳܐ ܡܓ،ܐܘ: »ܡܰܕ݂ܟܰܪܠܺܝ« ܝܰܥܢܺܝ »ܡܰܝܬܺܝ ܠܒܳܐܠܺܝ«! ܟܳܕ݂ܰܥܢܳܐ ܕܡܳܪܝܳܐ ܗܺܝܫ݈ ܠܳܐ ܟܳܛܳܐܥܶܗ، ܐܶܠܳܐ ܒܺܝ ܐܺܝܕ݂ܰܥܬ݂ܰܝܕ݂ܶܗ ܕܥܰܠ ‌ܐܽܘ ܛܥܳܝܼܰܝܼܕ݂ܰܢ ܟܳܛܳܐܠܷܒ ܡܺܝܢܰܢ، ܕܣܰܝܡܺܝܢܰܐ ܗܰܘܟ݂ܰܐ ܟ݂ܽܘܕ ܟܳܛܳܐܥܶܗ. ܝܰܥܢܺܝ ܒܽܘ ܬܰܕ݂ܟܳܪܳܐ ܟܷܬܠܰܢ ܡܰܥ̈ܢܰܐܬ (ܣܽܘ̈ܟܳܠܶܐ) ܡܩܰܪ̈ܪܶܐ. ܦܱ̇ܐܬ݂ܶܗ ܕܟܳܡܰܕ݂ܟܪܺܝܢܰܐ ܠܝܶܫܽܘܥ ܒܺܝ ܨܠܽܘܬ݂ܳܐ ܐܰܘܰܥܕܰܝ̈ܕ݂ܶܗ، ܘܶܐ‌ܠܰܢ ܗܶܫ ܙܶܝܕ ܟܳܘܶܐܠܰܢ ܐܺܝܒܰܥܬܳܐ ܐܰ‌ܠܠܶܗ.

ܒܢܝܡܝܢ ܐܘܙܠ