»ܟܶܐܦܳܐ ܕܺܐܝ ܬܰܪܩܰܠܬܳܝܳܐ ܘܫܶܢܳܐ ܕܽܐܘ ܟܷܫܠܳܐ« (ܡܙܡܘܪܐ 118،22؛ ܐܫܥܝܐ 8،14)،
ܘܓܡܺܝܬܰܪܩܠܺܝ ܐܶܒܰܗ ܦ݁ܰܝܳܐ ܕܠܳܐ ܡܰܨܷܬ݂ܬ݂ܶܗ ܠܺܝ ܡܷܠܬ݂ܳܐ، ܕܠܰܗ̱ܬ݂ܶܗ ܡܰܚܬܶܐܢܶܗ. (1. ܦܛܪܘܣ 2،8)
ܐܰܕܝܰܘܡܰܐ ܒܺܝ ܩܪܰܝܬܳܐ ܕܽܐܘ ܡܓܰܠܝܽܘܢ ܟܳܡܺܝܬܰܚܘܶܐܠܰܢ ܡܫܺܝܚܳܐ ܒܺܝ ܨܽܘܪܬܳܐ ܕܺܐܝ ”ܟܶܐܦܳܐ ܚܰـܝܬ݂ܳܐ“ ܘܢܰܩܠܰܗ ”ܟܶܐܦܳܐ ܕܪܺܝܫ ܩܽܘܪܢܝܬ݂ܳܐ“. ܘܬܰܡܳܐ ܣܬܶܗ ܟܳܡܺܝܒܰܚܷܣ ܥܰܠ ܐܰܢܰܥܺܝ̈ܡܶܐ ܕܷܡܬܰܘܠܕ݂ܺܝ ܡܶܗ ܚܰܕ̱ܬ݂ܳܐ! ܟܳܡܰܚܘܶܐܠܰܢ ܕܗܰܢܺܝܢܶܗ ܐܰܢܢܳܫ̈ܶܐ ܡܰܛܺܝ̈ܥܶܐ، ܕܰܐܬ݂ܷܝܢ ܠܓܰܒ ܐܺܝ ܟܶܐܦܰܐܬ݂ܶܗ. ܒܰܣ ܐܶܒܰܗ، ܒܺܐܝܕ݂ܶܗ ܟܺܝܬ ܥܒܰܪܬܳܐ، ܘܗܰܐܬ݂ܶܗ ܦ݁ܰܝܳܐ ܕܚܰܐ ܕܡܷܒܢܶܗ ܐܰܥܡܰܗ، ܠܰܫܷܢ ܕܟܽܘܠ ܚܰܐ ܗܳܘܶܐ ”ܟܶܐܦܳܐ ܚܰـܝܬ݂ܳܐ“ ܕܟܳܛܽܘܥܢܳܐ ܝܽܘܩܪܳܐ ܘܣܷܢܕܳܐ ܐܽܘ ܒܰܝܬܳܐ ܪܽܘܚܳܢܳܝܳܐ.
ܠܳܐ ܛܳܥܺܝܢܰܐ، ܐܰܝܢܳܐ ܕܠܳܐܬ݂ܶܗ ܘܛܳܪܶܐ ܕܡܷܒܢܶܗ ܐܰܥܡܶܗ، ܠܰܬܠܶܗ ܫ݈ܰܐܪܰܗ ܕܫܳܦܷ݁ܥ ܥܰܠ ܐܺܝ ܟܶܐܦܰܐܬ݂ܶܗ ـ ܠܳܐ، ܓܡܺܝܬܰܪܩܷܠ ܘܓܢܳܦܷܠ ܢܦܰܠܬܳܐ ܪܰܒܬ݂ܳܐ ܘܒܺܝܫܬܳܐ، ܓܡܷܡܥܷܪ. ܒܰܣ ܗܰܢܳܐ ܠܰܬܝܳܐ ܐܽܘ ܨܷܒܝܳܢܳܐ ܕܰܐܠܳܗܳܐ ܘܠܳܐ ܐܽܘ ܣܰܗܡܳܐ ܕܰܚܰـܝܰـܝ̈ـܕ݂ܰܢ. ܗܰܪܟܶܐ ܣܬܶܗ ܠܳܐ ܟܳܡܺܝܬܰܘܡܷܪ ܐܶܠܰܢ ܕܗܳܘܺܝܢܰܐ ܠܪܽܘܚܰܢ (ܟ݂ܽܘܕ ܟܺܝܬ ܕܟܷܡܡܺܝ) ܐܳܢܳܐ ܒܺܝ ܫܰܟ݂ܨܺܝـܝܰـܝܕ݂ܺܝ ܕܺܝܢܕܰܐܪܢܳܐ ܘܗܰܘܟ݂ܰܐ ”ܐܳܢܳܐ ܥܰܡ ܐܰܠܳܗܳܐ ܓܡܷܒܢܶܗܢܳܐ“. ܐܶܠܳܐ ܗܰܪܟܶܐ ܟܳܡܰܚܘܳܐܠܰܢ ܐܺܝ ܡܷܠܬ݂ܳܐ، ܕܰܐܢܢܳܫ̈ܶܐܢܶܗ ܕܟܳܛܽܘܥܢܺܝ ܐܽܘ ܒܰܝܬܳܐ ܕܰܐܠܳܗܳܐ ܘܥܰܡ ܚܕ݂ܳܕ݂̈ܶܐ ܟܶܬܬܶܗ ܡܫܰܝܠܽܘܬ݂ܳܐ ܕܡܷܒܢܳܐܝܺـܝ ܘܣܷܢܕܺܝ ܚܰܐ ܠܚܰܐ. ܡܫܰܝܠܽܘܬ݂ܳܐ ܠܽܘ ܒܢܳܝܳܐ ܡܷܕܠܶܗ ܗܰܘܳܐ، ܐܺܝܢܰܩܠܰܗ ܟܽܘܠ ”ܟܶܐܦܳܐ“ ܡܺܝܫܰܬܣܳܐ، ܡܺܝܬܰܪܟܘܳܐ ܘܡܺܝܣܰܘܝܳܐ ܥܰܡ ܐܺܝ ܟܶܐܦܳܐ ܕܪܺܝܫ ܩܽܘܪܢܺܝܬ݂ܳܐ »ܝܶܫܽܘܥ«. ܦ݁ܰܐܬ݂ܶܗ ܗܶܐܕܺܝ ܟܽܘܠ ܚܰܐ ܓܕܳܐܕ݂ܷܥ ܡܷܝܢ ܫܽܘܓ݂ܠܳܐ ܟܷܬܠܶܗ ܘܠܡܷܝܢ ܩܪܰܝܬܳܐ ܩܰܪܺܝ. ܓܽܘܕ ܡܰܛܺܝܥܺܝܢܰܐ ܘܡܰܨܺܝܬ݂ܺܝܢܰܐ ܦ݁ܰܐܬ݂ܶܗ ܓܬܳܘܺܝܢܰܐ ܙܰܕܺܝ̈ܩܶܐ ܘܡܐܰܡ̈ܢܶܐ.
ܢܰܩܠܰܗ ܚܰܐ ܐܰܚܽܘܢܳܐ ܡܕܰܡܕܡܳܢܳܐ ܚܠܷܡܠܶܗ ܡܰܐܝܷܬ݂ ܘܽܐܘ ܡܰܠܰܐܟ݂ܳܐ ܐܰܬ݂ܺܝ ܘܛܥܷܢܠܶܗ ܠܰܠܥܰܠ ܠܺܝ ܥܳܠܰܡܺܝـܝܶܗ. ܠܰܠܥܰܠ ܚܙܶܐܘܰܝܠܶܗ ܗܰܝܟܠܳܐ ܡܫܰܒܚܳܐ. ܡܺܝܥܰܔܰܒܘܰܐ ܒܥܰܝ̈ܢܶܐ ܪ̈ܰܒܶܐ ܒܽܘ ܒܷܢܝܳܢܳܐ ܕܽܘܡܳܪܰܢܳܐ ܘܗܰܐ ܡܰܕܷܩܠܶܗ ܒܽܘ ܫܽܘܪܳܐ ܘܚܙܶܐܠܶܗ ܢܰܩܘܳܐ ܪܰܒܳܐ، ܘܟܳܐܡܷܪ ܠܪܽܘܚܶܗ، ܟܳܡܰܚܘܶܗ ܕܟܺܝܬ ܗܰܪܟܶܐ ܟܶܐܦܳܐ ܢܳܩܽܘܨܬܳܐ. ܗܶܐܕܺܝ ܗܰܘܟ݂ܰܐ ܡܷܪܠܶܗ ܠܽܘ ܡܰܠܰܐܟ݂ܳܐ: ”ܗܰܐ ܗܰܢܳܐ ܡܷܝܢ ܢܰܩܘܳܐ ܡܰܝܺـܝܪܳܐܝܳܐ“؟ ܟܳܡܔܰܘܰܒܠܶܗ ܐܽܘ ܡܰܠܰܐܟ݂ܳܐ: ”ܗܰܢܳܝܳܐ ܐܽܘ ܢܰܩܘܳܐ ܕܗܰܬ ܣܷܡܠܽܘܟ݂“. ܡܳܪܝܳܐ ܩܪܶܘܰܝܠܶܗ ܬܰܡ ܐܶܠܽܘܟ݂ ܕܡܳܠܷܬ ܐܺܝ ܕܽܘܟܬ݂ܳܐ ܟ݂ܠܺܝܬ݂ܰܐܝܳܐ، ܒܽܘ ܡܶܕܶܗ ܕܗܺܝܝܶܗ ܡܚܰܕ݂ܰܪܠܶܐܠܽܘܟ݂. ܒܰܣ ܗܰܬ ܟܷܬܘܰܝܠܽܘܟ݂ ܟܽܘܠ ܢܰܩܠܰܗ ܘܟܽܘܠ ܙܰܒܢܳܐ ܡܶܕܶܗ ܚܪܶܐܢܳܐ ܒܗܰܘܢܽܘܟ݂، ܠܳܐ ܐܺܝ ܚܙܰܝܬܳܐ ܕܡܳܪܝܳܐ ܕܟܳܡܰܚܘܶܐܠܽܘܟ݂ܝܳܐ ܒܽܘ ܟܬ݂ܳܘܰܝܕ݂ܶܗ ܐܽܘ ܩܰܕܺܝܫܳܐ، ܘܗܰܘܟ݂ܰܐ ܠܳܐ ܩܰܕܺܝܪܷܬ، ܐܽܘ ܫܽܘܓ݂ܠܰܢܳܐ ܕܺܝܕ݂ܽܘܟ݂، ܕܐܰܠܳܗܳܐ ܗܽܘܠܶܗܠܽܘܟ݂ܝܳܐ، ܕܷܡܟܰܡܠܷܬ ܘܡܳܠܷܬ.
ܥܰܠ ܗܰܐܬ݂ܶܗ ܒܷܬ݂ܬ݂ܷܪ ܩܰܝܷܡ ܐܽܘ ܐܰܚܽܘܢܰܘܳܐ، ܘܛܪܶܐܠܶܗ ܡܽܘ ܕܰܡܕܳܡܳܐ ܘܡܽܘ ܦ݁ܰܬܦ݁ܳܬܳܐ ܘܡܽܘ ܬܰܫܟܳܝܳܐ ܥܰܠ ܟܽܘܠ ܐܰܡܶܕܳܢ̈ܶܐ ܕܠܳܐ ܟܠܷܙܡܺܝ ܒܺܝ ܥܺܕ̱ܬܳܐ ܗܰܘܟ݂ܰܐ ܘܗܰܘܟ݂ܰܐ، ܡܽܐܘܥܕܳܐ ܘܰܐܙܳܠܳܐ ܒܷܦܨܺܝܚܽܘܬ݂ܳܐ ܣܳܓ݂ܰܕ݂ܘܰܐ ܘܟ݂ܳܕܰܡܘܰܐ ܥܰܡ ܟܽܘܠܠܶܗ. ܐܳܒܰܥܘܰܐ ܐܷܠـܠܰܗ ܕܡܳܠܶܗ ܐܺܝ ܕܽܘܟܬ݂ܳܐ ܟ݂ܠܺܝܬ݂ܳܐ، ܐܽܘ ܢܰܩܘܳܐ ܕܟܺܝܬ ܒܽܘ ܗܰܝܟܠܳܐ ܕܰܐܠܳܗܳܐ. ܘܗܰܐܬ݂ܶܗ ܣܬܶܗ ܐܶܒܰܢܝܳܐ.
ܡܰܚܺܝܣܺܝܢܰܐ ܡܦܰܬܫܺܝܢܰܐ ܪܽܘܚܰܢ ܘܕܽܘܥܪܺܝܢܰܐ ܠܺܝ ܚܽܘܒܳܐ ܘܠܺܝ ܚܕ݂ܳܝܽܘܬ݂ܳܐ ܕܺܐܝ ܐܰܚܽܘܢܽܘܬ݂ܳܐ ܕܒܽܘ ܪܽܘܚܳܐ، ܕܰܐ ܡܰܝܬܺܝܢܰܐ ܠܰܐܠܳܗܳܐ ܦܺܐܪ̈ܶܐ ܫܰܦܺܝܪ̈ܶܐ ܘܟܳܠܺܝܢܰܐ ܒܽܘ ܝܽܘܠܦܳܢܳܐ ܢܰܐܝܺـܝـܚܳܐ ܕܺܐܝ ܡܷܠܬ݂ܰܝܕ݂ܶܗ ܕܠܳܐ ܡܺܝܙܰܥܙܥܺܝܢܰܐ ܡܰܐ ܥܰܠ̈ܥܳܠܶܐ ܕܽܐܘ ܥܽܘܠܡܰܢܳܐ، ܥܰܠ ܕܡܰܛܝܳܐ ܐܺܝ ܚܰܪܰܝܬܳܐ ܕܟܽܘܠ ܡܶܕܶܗ، ܘܽܐܘ ܚܷܟܟܷܡ ܕܰܐܠܳܗܳܐ ܡܫܰܪܶܐܠܶܗ ܒܽܘ ܒܰܝܬܳܐ ܕܰܐܠܳܗܳܐ. ܬܳܐܟ݂ܽܘ ܝܰܐ ܪ̈ܚܺܝܡܶܐ ܬܳܐܟ݂ܽܘ ܕܽܘܥܪܺܝܢܰܐ ܠܓܰܒ ܝܶܫܽܘܥ ܡܫܺܝܚܳܐ ܒܠܶܒܳܐ ܫܰܪܺܝܪܳܐ ܘܬܰܝܳܒܳܐ ܡܶܗ ܟܽܘܠ ܦܰܬܺܝܪܽܘܬ݂ܳܐ، ܡܰܝܺـܝܪܽܘܬ݂ܳܐ ܠܰܔܷܢ ܐܽܘ ܒܰܝܬܳܐ ܕܰܐܠܳܗܳܐ. ܡܰܐ ܠܳܐ ܟܳܫܳܘܶܐ؟ ܡܰܐ ܠܰܬܝܳܐ ܒܰܣ ܐܽܘ ܡܶܕܶܗ ܕܣܷܡܠܶܐܠܰܢ؟ ܬܳܐܟ݂ܽܘ ܗܰܘ ܡܚܰܙܢܺܝܢܰܐܠܶܗ، ܐܶܠܳܐ ܪܽܘܗܛܺܝܢܰܐ ܒܷܬ݂ܪ ܐܺܝ ܚܽܘܒܳܐ ܘܽܐܘ ܫܠܳܡܳܐ ܘܟܽܘܠ ܡܶܕܶܗ ܣܰܝܡܺܝܢܰܐ ܠܽܘ ܒܷܢܝܳܢܳܐ ܕܷܚ̈ܕ݂ܳܕ݂ܶܐ!
ܒܢܝܡܝܢ ܐܘܙܠ